Ang Pag-akyat sa Langit (Markos 16:19-20)

Ang Markos 16:19-20 ang huling bahagi ng mga kaganapang isinasalaysay sa Markos 16:9-20 na naglalaman ng mga pagpapakita ng Panginoon sa mga alagad. Ang mga talata 19-20 ay tungkol sa pag-akyat ng Panginoon sa kalangitan. Mapapansin na dito ang Pag-akyat ng Panginoon ay may kasabay na isa pang kaganapan: ang pagsusugo sa mga alagad. Kung matatandaan, sa Lukas 24 at Gawa 1, ang mga alagad ay bumalik sa Jerusalem upang hintayin ang pagbaba ng Banal na Espiritu. Sa Mateo 28, ang mga alagad ay isinugo lang; walang binanggit dito tungkol sa pag-akyat ng Panginoon. Sa Markos 16 ang pag-akyat ng Panginoon ay kasabay ng pagsusugo sa mga alagad. Ang Kapistahan ng Pag-akyat sa Kalangitan ay tungkol sa pagluklok ni Kristo bilang Panginoon. Ayon nga kay San Pablo, siya ay iniluklok bilang Ulo ng Iglesya, ang “Kapunuan Niya na pumupuno sa lahat ng dako” (Ephesians 1:23). Ang pagluklok ng Panginoon ay may kasabay sa lupa: ang paglaganap ng kanyang paghahari.

Ang Teksto

Ihambing ang sumusunod na salin ng Markos 16:19-20 sa saling inyong gamit. Pansinin ang mga pandiwa, pangngalan at panag-uri. Tandaan na ang mga talatang ito ay ikalawang bahagi ng mga kwento ng Muling Pagkabuhay sa ebanghelyo ni Markos (16:9-20)

¹⁹Ang Panginoong Hesus naman

pagkatapos magsalita sa kanila
ay dinala sa kalangitan
at umupo sa kanan ng Diyos.

²⁰Ang mga iyon nama’y

nagsilabas
at nagpahayag

sa lahat ng dako

samantalang ang Panginoo’y kasama nilang gumagawa

at nagpapatotoo sa salita

sa pamamagitan ng mga tandang kasabay nito.

Mga Tanong Tungkol sa Teksto

1. Kailan naganap ang kaganapan?
2. Ano ba ang sinabi ng Panginoon?
3. Kanino niya sinabi ang mga ito?
4. Ano ang nangyari sa Panginoon pagkatapos niyang magsalita?
5. Ano naman ang ginawa ng kanyang mga kausap?
6. Ano ang kanilang ipinahayag?
7. Anu-anong tanda ang tinutukoy dito?
8. Iniwan ba ng Panginoon ang mga alagad nang siya’y umakyat sa kalangitan?

Para sa mas malalim na pagunawa

1. Pag-aralan ang mga sumusunod na talata na nagtataglay ng salitang isinalin na “at siya’y dinala (paitaas)”. Alamin ang konteksto ng mga ito at pagkatapos ay unawain kung ano ang kaugnayan ng mga talatang ito sa Markos 16:19

• Gawa 1:2.22
• Gawa 10:16
• 1 Timothy 3:16

2. Pag-aralan ang mga sumusunod na talata na nagtataglay ng ekspresyong “sa kanang-kamay (ng Diyos)”. Alamin ang konteksto at unawain ang kaugnayan nito sa ekspresyong katulad sa Markos 16:19

• Matthew 22:44; Lukas 20:42; Markos 12:36
• Markos 14:62
• Gawa 2:34
• Gawa 7:5-56
• Hebrews 1:13
• Awit 110:1

3. Para sa kaugnayan ng Markos 16:19-20 sa kapistahan ng Pag-akyat sa Kalangitan, basahin ang mga bilang 659-667 ng Catechism of the Catholic Church

Tags: Ascension, Longer Ending, Markos