Ang Pag-ibig sa Diyos at sa Kapwa

Ang katanungan tungkol sa pinakadakilang kautusan ay mahalaga para sa isang deboto ng Diyos ng Israel. May 613 na kautusan sa Torah at mahirap tandaan ang mga ito. Upang matulungan ang mga deboto na maalala ang mga ito at maisagawa, ang mga eskwelahan ng Fariseo ay nagsaliksik upang malaman ang kautusan na kapag isinagawa’y naisagawa na rin ang iba. Ang katanungan ng eksperto sa batas ay isang katanungang "pang-eskwela". Sa kanyang kasagutan, ipinaalala ni Hesus na ang pag-ibig sa Diyos ay hindi maaaring ihiwalay sa pag-ibig sa kapwa.

Ang Teksto

³⁴Nang marinig ng mga Fariseo
na napatahimik ni Jesus
ang mga Saduseo,
sila ay nagtipun-tipon.
³⁵Ang isa sa kanila
na dalubhasa sa kutusan
ay nagtanong kay Jesus,
na sinusubukan siya.
³⁶Sinabi niya:
Guro,
alin ang pinakadakilang utos sa Kautusan?

³⁷Sinabi ni Jesus sa kaniya:
Ibigin mo
ang Panginoon mong Diyos

nang buong puso mo,
nang buong kaluluwa mo
at nang buong pag-iisip mo.

³⁸Ito ang una at dakilang utos.
³⁹Ang pangalawa ay katulad din nito:
Ibigin mo

ang iyong kapwa
tulad ng iyong sarili.

⁴⁰Sa dalawang utos na ito

nakasalalay ang lahat ng bagay
na nasa mga Kautusan at sa mga Propeta.

Pansinin ang mga sumusunod

1. Ang pag-uusap tungkol sa pinakadakilang utos ay nasa konteksto ng paghaharap ni Hesus at mga lider sa Jerusalem (t. 34)
2. Ang "pinakadakilang utos" ay iyong utos na kapag ginagawa mo’y nagagawa mo na rin ang 613 kautusan sa Torah.
3. Dalawang utos sa Torah ang ibinigay na kasagutan ni Hesus, isa’y mula sa Deuteronomy 6:5 at ang ikalawa’y mula sa Leviticus 19:18
4. Ang sitas mula sa Leviticus 19:18 ay sinabi ni Hesus na "ikalawa" at "katulad" ng nauna
5. Sinabi ni Hesus bilang pagtatapos na sa dalawang utos na ito ay nakasalalay ang Batas at mga Propeta

Para sa mas malalim na pag-unawa sa teksto

• Pag-aralan ang Mateo 5-7 at isa-isahin kung alin sa mga talatang ito ay tungkol sa pag-ibig sa Diyos at sa kapwa
• Kumunsulta rin ng isang komentaryong pam-bibliya at tingnan kung ano ang sinasabi nito tungkol sa Deuteronomy 6:5 at Leviticus 19:18.
• Ang ekspresyong "Batas at Propeta" ay ginamit ni Mateo sa mga sumusunod na talata
  • Matthew 5:17
  • Matthew 7:12
  • Matthew 22:40

  Sa base ng gamit na ito, ano ang ibig sabihin ng ekspresyon sa pagkakagamit ni Hesus?