Ang Tunay na Pagbibigay (Markos 12:38-44)

Ang tema ng ika-32 Linggo ng Panahong May Bilang ay tungkol sa pagbibigay. Dalawang babaeng balo ang ipinapakitang halimbawa nito: ang balo ng Zarephat na tumulong sa propetang Elias at ang babaeng balo na nakita ni Jesus sa may templo ng Jerusalem. Ang mga babaeng balo ay kasama sa mga dapat tulungan ng lipunan, kung kaya naman para sa mga propeta isang malaking kasalanan ang hindi pagtulong sa mga tao. Sa Markos 12:38-40, binabanggit ni Jesus ang panghuhuthot ng mga eskriba sa mga balo ang isang dahilan kung bakit mas mabigat ang parusang ipapataw sa kanila ng Diyos. Sa Markos 12:41-44, may isang balong nakatawag ng pansin kay Jesus. Para sa kanya, kahit maliit na halaga lamang ang ibinigay ng babae, siya ang tunay na nagbigay ng kaloob sa Templo. Pansinin na ang tunay na nagbibigay ng kaloob ay siyang mula sa kanyang kahirapan ay nagbigay “ng buo niyang kabuhayan”.

Ang Teksto

Pagkatapos gawan ng Daloy ng mga Parirala ang sumusunod na teksto, gumawa ng balangkas na nagpapakita ng dalawang bahagi nito. Bigyan ng pamagat ang mga bahagi ng tekstong ginawan ng balangkas.

Napakaraming tao ang malugod na nakikinig sa kanya. ³⁸ Sa kanyang pagtuturo, sinabi ni Jesus, “Mag-ingat kayo sa mga tagapagturo ng Kautusan na mahilig magpalakad- lakad na suot ang kanilang mahahabang damit at nagagalak na sila’y igalang ng mga tao. ³⁹ Ang gusto nila ay ang mga natatanging upuan sa mga sinagoga at ang mga upuang pandangal sa mga handaan. ⁴⁰ Hinuhuthot nila ang ari-arian ng mga biyuda at ang mahahaba nilang dasal ay mga pagkukunwari lamang. Dahil diyan, lalo pang bibigat ang parusang igagawad sa kanila.”

⁴¹ Naupo si Jesus sa tapat ng lalagyan ng mga kaloob doon sa Templo, at pinagmasdan ang mga naghahandog ng salapi. Napansin niyang maraming mayayaman ang naghuhulog ng malalaking halaga. ⁴² Lumapit naman ang isang biyudang mahirap at naghulog ng dalawang tigsisingkwenta sentimo. ⁴³ Tinawag ni Jesus ang kanyang mga alagad at sinabi sa kanila, “Sinasabi ko sa inyo, ang inihandog ng biyudang iyon ay higit na marami kaysa sa inihulog nilang lahat. ⁴⁴ Sapagkat ang lahat ay nagkaloob ng bahagi lamang ng kanilang kayamanan, ngunit ang ibinigay ng biyudang iyon, bagama’t siya’y mahirap, ay ang buo niyang ikinabubuhay.”

Mga Tanong Tungkol Sa Teksto

1. Nasaan si Jesus nang siya’s magsalita sa Markos 12:38? Sino ang kanyang mga kausap? Sino ang kanyang tinutukoy sa kanyang babala?
2. Sino ang mga eskriba/tagapagturo ng batas? Lahat ba sila ay masama sa paningin ni Jesus?
3. Anu-ano ayon kay Jesus ang masamang gawain ng mga eskriba?
4. Sino ba ang mga balo? Ano ang ayaw ni Jesus na ginagawa ng mga eskriba sa mga balo? Ano ba ayon sa Bibliya ang gagawin para sa mga balo?
5. Nasaan si Jesus sa t. 41? Sino ang kanyang mga kasama? Ano ang kanyang ginagawa? Ano ang kanyang nakita?
6. Para saan ang kontribusyon ng mga tao?
7. Sa mga taong nagbibigay ng kani-kanilang mga kontribusyon, sino ang nakatawag pansin kay Jesus? Ano ang kanyang napansin?
8. Sino sa mga taong nanduon ang tunay na nagbigay ng kaloob? Ano ayon kay Jesus ang tunay na nagbibigay?
9. Magkano ang ibinigay ng balo?
10. Ayon kay Jesus, kung ang isang tao ay magbibigay ng piso kahit maaari namang magbigay ng sampung piso, siya ba ay tunay na nagbibigay ng kaloob?

Para Sa Mas Malalim na Pag-unawa

1. Basahin ang kuwento sa 1 Hari 17:10-16 at alamin kung anu-ano ang pagkakatulad nito sa kwento ni Markos sa 12:41-44. Sino ang bida sa mga kwentong ito?
2. Pag-aralan ang mga sumusunod na talata

Tags: babaeng balo, eskriba, Markos