Sa umpisa pa lamang ng ebanghelyo ni Juan ay may kumilala na kay Jesus bilang Hari ng Israel (Juan 1:49). Nang mapakain niya ang madla mula sa ilang piraso ng tinapay ay may mga kumilala rin kay Jesus bilang hari (Juan 6:15) nguni’t umalis si Jesus at nagtago sa bundok. Sa kanyang maringal na pagpasok sa Jerusalem siya ay binati ng mga tao bilang Hari ng Israel (12:13.15). Sa pamamagitan ng mga talatang ito mula sa tinatawag na “Aklat ng mga Tanda” ng Ebanghelyo ni Juan, ang Sekreto Mesiyaniko na matatagpuan sa mga Sinoptiko (Markos, Lukas at Mateo) ay masisilip din. Sa ikalawang bahagi ng Ebanghelyo ni Juan — Ang Oras ni Jesus — ay ipapaliwanag kung anong uring Hari siya. “Ang kaharian ko’y hindi sa daigdig na ito” sasabihin ni Jesus.
Ang Teksto
28 Maaga pa nang dalhin si Jesus sa palasyo mula sa bahay ni Caifas. Hindi pumasok ang mga pinuno ng mga Judio sa palasyo upang sila’y huwag maituring na di karapat-dapat kumain ng hapunang pampaskwa. 29 Kaya’t si Pilato ay lumabas sa palasyo at tinanong sila, Ano ang paratang ninyo laban sa taong ito? 30 Sila’y sumagot, Hindi po namin siya dadalhin sa inyo kung hindi siya gumawa ng masama. 31 Sinabi sa kanila ni Pilato, Dalhin ninyo siya at hatulan ayon sa inyong batas. Subalit sumagot ang mga Judio, Wala po kaming kapangyarihang humatol ng kamatayan kaninuman. 32 Sa gayon, natupad ang sinabi ni Jesus nang ipahiwatig niya kung sa anong paraan siya mamamatay.
33 Si Pilato ay pumasok uli sa palasyo at ipinatawag si Jesus. Ikaw ba ang Hari ng mga Judio? tanong niya.
34 Sumagot si Jesus, Iyan ba’y sarili mong palagay, o may ibang nagsabi sa iyo? 35 Tugon ni Pilato, Hindi ako Judio. Ang mga kababayan mo at ang mga punong pari ang nagdala sa iyo rito. Ano ba ang ginawa mo?
36 Sumagot si Jesus, Ang kaharian ko’y hindi sa daigdig na ito. Kung sa daigdig na ito ang aking kaharian, ipinakipaglaban sana ako ng aking mga tauhan at hindi naipagkanulo sa mga Judio. Ngunit hindi sa daigdig na ito ang aking kaharian!
37 Kung ganoon, isa ka ngang hari? sabi ni Pilato.
Sumagot si Jesus, Ikaw na ang nagsasabing ako’y hari. Ito ang dahilan kung bakit ako ipinanganak at naparito sa daigdig, upang magsalita tungkol sa katotohanan. Nakikinig sa aking tinig ang sinumang nasa katotohanan.
38 Ano ba ang katotohanan? tanong ni Pilato.
Mga Tanong Tungkol sa Teksto
Para Sa Mas Malalim na Pag-unawa ng Teksto
1. Ituloy ang pagbasa hanggang Juan 19:22 at alamin ang mga sumusunod (a) Ang paratang bang si Jesus ay Hari ng mga Hudyo ay kinilala ni Pilato? Sa paanong paraan? (b) Ninais ba ni Pilato ang kamatayan ni Jesus? Masasabi bang wala siyang kinalaman sa pagkamatay ni Jesus? Anong pandiwa ang ginamit ng ebanghelyo upang ipakitang si Pilato ay may kinalaman sa paghihirap at kamatayan ni Jesus?
2. Basahin din ang mga talatang sumusunod at unawain ang kani-kanilang konteksto.
(a) katotohanan: Juan 1:14; 1:17; 3:21; 4:23; 4:24; 5:33; 6:14; 7:26; 8:32; 8:40; 8:44; 8:45; 8:46; 14:6; 14:17; 15:26;16:7;16:13; 17:17;17:19;18:37;18:38;
(b) hari: Juan 1:49; 6:15; 12:13; 12:15; 18:33; 18:37; 18:39; 19:3; 19:12; 19:14; 19:15; 19:19; 19:21
Email This Page
Print This Page
